Amo 1 | NdeIBE | STEP | La ngamazwi ka-Amosi, omunye wabelusi baseThekowa – lokho akubonayo mayelana lo-Israyeli eminyakeni emibili ngaphambi kokuzamazama komhlaba, ngezinsuku u-Uziya eyinkosi yakoJuda loJerobhowami indodana kaJehowashi eyinkosi yako-Israyeli.

Amos 1

1 La ngamazwi ka-Amosi, omunye wabelusi baseThekowa – lokho akubonayo mayelana lo-Israyeli eminyakeni emibili ngaphambi kokuzamazama komhlaba, ngezinsuku u-Uziya eyinkosi yakoJuda loJerobhowami indodana kaJehowashi eyinkosi yako-Israyeli.

2 Wathi: “UJehova uyavungama eseZiyoni, idume iJerusalema; amadlelo abelusi ayoma lengqongo yeKhameli iyabuna.”

Ukwahlulelwa kwabakhelene lo-Israyeli

3 Nanku okutshiwo nguJehova: “Ngenxa yezono ezintathu zeDamaseko, loba ngenxa yezine, kangiyikulunqanda ulaka lwami. Ngenxa yokuthi yatshaya iGileyadi ngemibhulo elamazinyo ensimbi,

4 ngizathumela umlilo endlini kaHazayeli ozalobisa izinqaba zikaBheni-Hadadi.

5 Ngizabhidliza isango laseDamaseko; ngizachitha inkosi ephakathi kweSigodi sase-Aveni lalowo ophethe intonga yobukhosi eBhethi Edeni. Abantu base-Aramu bazathunjwa basiwe eKhiri,” kutsho uJehova.

6 Nanku okutshiwo nguJehova: “Ngenxa yezono ezintathu zeGaza loba ngenxa yezine, kangiyikulunqanda ulaka lwami ngenxa yokuthi yathumba abantu bezigaba zonke yabathengisa e-Edomi,

7 ngizathumela umlilo emidulini yaseGaza ozalobisa izinqaba zayo.

8 Ngizayichitha inkosi yase-Ashidodi kanye lalowo ophatha intonga yobukhosi e-Ashikheloni. Ngizaphendulela isandla sami ekuhlaseleni i-Ekhironi kuze kufe umFilisti wokucina,” kutsho uJehova Wobukhosi.

9 Nanku okutshiwo nguJehova: “Ngenxa yezono ezintathu zaseThire loba ngenxa yezine, kangiyikulunqanda ulaka lwami. Ngenxa yokuthi abantu bezigaba zonke abathunjwayo yabathengisa e-Edomi inganaki isivumelwano sobuzalwane,

10 ngizathumela umlilo emidulini yaseThire ozalobisa izinqaba zayo.”

11 Nanku okutshiwo nguJehova: “Ngenxa yezono ezintathu zase-Edomi loba ngenxa yezine, kangiyikulunqanda ulaka lwami. Ngenxa yokuthi waxotshana lomfowabo ngenkemba, enqabela isihawu sonke, ngoba ulaka lwakhe lwavutha kokuphela lentukuthelo yakhe yabhebha ingelakuthitshwa,

12 ngizathumela umlilo eThemani ozalobisa izinqaba zaseBhozira.”

13 Nanku okutshiwo nguJehova: “Ngenxa yezono ezintathu zase-Amoni, loba langenxa yezine, kangiyikulunqanda ulaka lwami. Ngenxa yokuthi waqhaqha abesifazana abazithweleyo baseGileyadi ukuze aqhelise ilizwe lakhe,

14 ngizathungela imiduli yaseRaba ngomlilo ozalobisa izinqaba zayo kumenyezelwa izitsho zempi ngosuku lokulwa kulomoya olamandla ngosuku lwesiphepho.

15 Inkosi yalo izathunjwa, yona kanye lezikhulu zayo,” kutsho uJehova.